Баланы еркелету керек пе?

Бала тәрбиелегіш ата-аналар болады ғой. Кеше біреуін кездестірдім. Төрттердегі бүлдіршін қызын жетектеп кетіп барады екен. Мен оларға жете бергенде, олар  тұрған орындарынан жылжымай қалды.  Мен оларға соғылып қала жаздадым да, айналып өте беріп едім, әлгі әйел маған бір қарады да, қызына ұрса бастады. «Көше ортасында кісілерге «мешайт» етіп тұруға болмайды деп айттым емес пе мен саған! Неше рет айтуға болады!» деп қызын жұлқылай бастады. Сондағысы, қызы бірдеңе жеп келеді екен. Соны бір тістеу үшін тұрып қалған болуы керек.  Қатты қысылдым.  Бүлдіршін бала мен үшін ұрыс естіді-ау! Бірақ бір жағынан қарасаң, мұндай ұсақ-түйекке ұрсысатын анасы, басқа  істері үшін мүлде күн көрсетпейтін болар. Ондайлар көп қой. Баласына  ештеңені айтып түсіндірместен, жатып кеп айқайлап жататындарды жиі көремін. Көрген сайын, ішің ашиды. 

Түнеугүні мынандай жайт болды. Туысқанымның баласы ауырып, басқа ешкімнің қолы тимеген соң, балалар ауруханасына мен апардым. Бізді  түпкі бөлмеде хирург дәрігер қарап жатыр. Ал ауыз бөлмеде екі жасар қызы бар келішек тұр. Әлгі бөбек әлденеге анасының қолынан тартып, шырқырап жылап тұр. Бір жерде отырып, жалықты, білем. Бала жылағанда  бізді қарап жатқан хирург өз  сөзі өзі естімейді. Ал ана келіншек болса, қақшиып қатып тұрып алды. Анда-санда: «Айттым ғой мен саған, бармаймыз! Осы жерде тұр!» деп айқайлайды. Оны 2 жасар бала ұға ма?! Бала жылағанын қояр емес, келіншек сазырайып ол тұрып алды. Өзінше баласын тәрбиелеп тұрғаны. Тұп-тура 20 минут жылады. Тағы жылаған шығар, біз кетіп қалдық.

Мамам: «Бала жылағанда алдымен назарын басқа нәрсеге аударып жіберу керек. Шырқыратып жылатып қоймау керек, тәрбие деген ол емес!»- деп айтып отырады.  Ал менің айтайын дегенім, құрметті ата-аналар, балаларыңды жылатып қоймаңдаршы!   Экзюперидің: «Балаларды міндетті түрде еркелету керек. Кім білсін, оларды алдында не күтіп тұрғанын!» деген сөзіне қатты келісемін.  Оған қоса, үйде өз ата-анасы сүймеген баланы сырттағы ел қайдан жақсы көрсін! Баланың алды ашық, болашағы бақытты болу үшін, оны ақшамен қамтамасыз ету жеткіліксіз. Оларды жақсы көріп, еркелету керек!